一起走向電影的天空

召喚食辣嘅朋友仔！呢幾年，越嚟越多以川菜為主題嘅餐廳開幕，加上我同我啲朋友仔都好鍾意食辣，所以每個月都有發掘一啲吸引嘅川菜試吓！今次要介紹嘅位於銅鑼灣京都廣場嘅麻辣風雲，見佢都開咗幾間分店，聽聞係由ToNick嘅主音恆仔同其他股東一齊開，而主廚都好有經驗，好似話係五星級酒店擔任過中菜廳主管！講到咁勁，就等我去試試佢啦！

一入到去，每枱都會先放兩碟前菜，有紫菜花生同中華沙律，味道就正正常常，無記錯好似係$9碟，如果唔想食，記得同佢講唔需要啊～

跟住就係今晚嘅重頭戲，期待咗好耐嘅酸菜魚！！一上嚟嘅賣相已經好吸引！湯面鋪滿花椒、泡椒、桂花瓣同酸菜，而個湯底係奶白色嘅！都夠酸辣嘅，但私心想再辣多少少，但佢好在唔會太咸，可以當湯飲，用嚟撈飯就最適合！入面嘅配料都幾多，有蘆筍、酸菜、菇同薯粉，而啲魚又滑又無骨，食落都好滑，冇腥味啖啖肉，唔夠仲可以加配料，夠哂飽！

另外，我哋都叫咗個酸辣土豆絲，睇落好似乎無咩特別，但就越食越開胃！酸酸辣辣咁，唔經唔覺就會食哂全碟！唯一覺得就係淋咗少少，如果再爽口啲就好啦！建議大家都叫嚟吓，味道嚟講係幾唔錯！

最後，梗係要試埋呢到最signature嘅炸饅頭啦！嚟到見到基本上面枱枱都有叫呢架饅頭船嚟打卡，一上枱嗰下仲有煙嘅，夠哂搶眼同打卡able！而饅頭炸到外面香脆入面軟熟，熱辣辣上枱，再沾煉奶食真係冇得輸！一定要叫嚟試吓啊！

今次因為得兩個人嚟，所以唔係試咗好多野，但總括嚟講味道都唔錯，價錢以銅鑼灣嚟講都差唔多！如果一大班fd一齊慶生聚會，呢間都係一個幾好嘅選擇！多啲人嚟仲可以試多野食添！歡迎大家食完係下面分享我知有咩係必試啊！